بَسّچ تِرِفين

ميسون نعيم الرومي
maiamaison@yahoo.com

2023 / 4 / 6

بسچ يعيني بعد اوبسچ ترفين
نترجه الفرح وانتي تحذرين
خلصتي العمر بالحسره والآه
مللنه الصبر وانتي تعرفين
واجروح الگلب ملچومه الجروح
واخبار التجي تشعل چوانين
***
تعبنه الوگ وانتي تعرفين
ندور بالدرب واننشد الماشين
بس الحزن داير علينه ايدور
نتأمل نظل والأمل رايح وين
نتباوع للسمه والعين تربي دوم
هلبت علينه تحن تذكرنه واتعين
***
چا شنهي الذنب نتعاقب اوليش
باديار الغرب طشينه اللسنين
خجلان الدمع يترجه العيون
من ترمش تظل ! لتصير شطين
مهضومه هضم وامحمـّـِله اهموم
من زغري اون يادنيه ليوين
***
اضحك چذب والگلب لهبة نار
ضلع واحد يصل واليوم ضلعين
ياجرح الچبيرابروحي محفور
جرح واحد گبل واليوم جرحين
بسچ يعيني بعد اوبسچ ترفين
نترجه الفرح وانتي تحذرين
------------------------------------------
نيسان / 2023
ســــــــــــــــتوكهولم



https://www.ssrcaw.org
Centre of Laic Studies and Research in the Arab World