حِجّة ملّا سوادي

حِجّة ملّا سوادي ..

ستة وعشرون حجة، وضعفها عمرات أنزل الله بهن نعمته على ملّا سوادي منذ عام التحرر والانعتاق عام 2003 .. كيف نزلت عليه تلك النعمة ! .. الله والبرلمان وال( مدري شنهي ) وحدهم يعلمون ذلك .. كل تلك النعم لم تثني المشاغب الحاسد الحسود عن إصراره على عدم منحه لقب ( حجّي)، ولا زال يدعوه ب ملّا …
أثناء مباركة الجموع لملّا سوادي بمناسبة عودته من الحج في العام الماضي ، كان جويسم من ضمن المهنئين ولكن ! لا زال يلقبه ب ( ملّا) رغم كل ذلك العدد المبارك من البركات ..
⁃ مبروك عليك ( ملّا) وحجة مقبولة إنشاء الله والعوده العوده ..!
⁃ الله وكبر .. لا وين اتظل اتسميني ( ملّا) يا نذل !!
⁃ ملّا .. موش بس على الحجة لكن أبارك لك ما حلمت بيه عنك البارحه بالطيف !!
⁃ خير انشالله .. ولو ما أشوف يجي منك خير يا جويسم ..!
⁃ ملا .. چنك ميت !
⁃ لا بارك الله بيك ..
⁃ تجيك السالفه ملا .. أخذناك إلى كربلا .. قبل ما نوصل اويتلگانا الحسين سلام الله عليه .. عمت عيني ، گال : مات ملّا سوادي ؟! لا مع الأسف ! تنحّب عمت عيني اوبچى ..!
⁃ ابروح أبوك صدگ تحچي ؟! الحسين بچى عليه ؟!
⁃ اي والبيت اللي حجيته ملا .. گال عمت عيني : لا اتدخلوه كربلا .. امير المؤمنين ينتظره في النجف .. رحنا للنجف وادوينات الولايه تلگانا الإمام سلام الله عليه .. هم تأسف ونزلت دمعته ومسحها بغترته الخضرا وگال عمت عيني : ولو ملّا سوادي اله قصر بالجنه لكن الرسول ص وصّى بنقله يمّه وهو ينتظر ..
⁃ ابروح موتاك ولك هذا الحچي صدگ ؟!
⁃ اي والله ( ملّا) .. ما أطولها عليك أخذناك أورحنا .. احنا وصلنا عرعر المغرب والدنيا صارت چنها الفجر ، ولن الرسول صلى الله عليه وسلم يتلگانا على ناگته چنه گمر ليلة 14 ..! بس هوه ياساتر مغضب !! بس وصلنا يمّه أولنّه بطل حيلي ايگول : ياهو هذا ؟! جايبيلي ملّا أسوَد ؟! أنا عايز ؟! .. صارله (سته اوعشرين سنه ) رايح راد عليّه ، والنوب حتى اوهوه ميّت ما خلصت منّه ! .. تردون اتدفنونه يمّي ؟!منّا اوردّوه لو تنخسف بيكم الأرض مثل ما انخسفت بثمود !!