وتقاعد الشيطان

( منظر غرفة ضيوف ، يدخل شخصين بلباس الشياطين الشيطان الأب وشيطون الإبن . سعاد تجلس على سجادة الصلاة وترفع يديها بعد الصلاة للدعاء )
شيطون : خلص يا بوي ما النا قعدة هون هاي المرأة ملتزمة بالصلاة والحجاب
أبو شيطون : اصبر يا شيطون ، الف مرة علمتك لا تستعجل على رزقك
شيطون : حاضر يابوي ، بس الكتاب مبين من عنوانه
ابو شيطون : لا تغرك العناوين ولا الكتب يا ولدي . اسكت يا شيطون واصبر واتعلم مني
شيطون : ماشي يا بوي هينا قاعدين تنشوف اخرتها
سعاد : اللهم عافينا واعفو عنا وارحمنا ، اللهم ابعد عنا اولاد الحرام ، اللهم ابعد عنا وسوسة الشياطين
( ينظر الشياطين لبعضهم البعض باستغراب )
أبو شيطون : الله لا يوفقك ، هسة احنا بنوسوس ! ترى أنا جايب الولد يتعلم منك الوسوسة
( يرن صوت جرس الهاتف )
سعاد : السلام عليكم ... اهلا اهلا جارتي حبيبتي ... ادخلي حبيبتي الباب مفتوح ... اها كنت اصلي ... اهلا وسهلا ادخلي
( تنهض سعاد وتلملم سجادة الصلاة وتضعها على الكرسي وتجلس بانتظار جارتها زينب ، تدخل زينب وتقف سعاد لاستقبالها )
سعاد : اهلا يا روحي ، هلا بجارتي الغالية
زينت : يسعد هالمسا يا احلى جارة ، الله يتقبل
سعاد : منا ومنك يا زينب ، منيح يلي شرفتيني بزيارة ، صارلي فترة ما طلعت من البيت
زينب : اخبار السعادة يختي . وانا كمان صارلي زمان ما طلعت من البيت وكتير زهقانة ، عشان هيك جيت اغير جو معك
سعاد : بتعرفي صارلي زمان ما غلبتك بطاولة الزهر ، شو رأيك اغلبك هسة بدق طاولة
زينب : لا حبيبتي والله مش ببالي العب طاولة ولا حتى العب الشدة
( ينظر شيطون لوالده )
شيطون : يابوي خلص ما النا قعدة هون خلينا نشوف شغلنا وننجز في بيت ثاني
ابو شيطون : فعلا هاي اليوم بأخره وما انجزنا ولا سيئة ، يا خزوتنا قدام جماعتنا
( يهم شيطون ووالده بالخروج )
سعاد : طيب حبيبتي متل ما بدك ، على فكرة شو في اخبار عن الحارة والناس والبشر
( يتوقف شيطون ووالده بعد سماع كلام سعاد وينظران لبعض )
ابو شيطون : ( ينظر الى ولده بفرح ) اها . هلا بلش الفلم
( يعود شيطون ووالده لمكانهما )
زينب : اخبار السلامة ان شاء الله ، شو بدك تعرفي يعني
سعاد : بلشي من اي قصة تعجبك
زينب : لا حبيبتي أنا رأيي انتي اسألي وانا بجاوب احسن
شيطون : فعلا يا بوي انك معلم ، ابلش اسجل ولا على مهل
ابو شيطون : اصبر شوي ، هذول النسوان مثل سيارات الديزل لازم يسخنو بالأول وهسة ببلش الجد
سعاد : ماشي حبيبتي ، أول سؤال شو اخبار جارتنا مريم ؟
زينب : ( باستغراب ) مريم ، وينك ووين مريم هسة
سعاد : خير يا زينب ، خوفتيني شو مالها مريم
زينب : مريم يختي صارت مليونيرة
سعاد ، بتحكي جد ؟؟؟ ليكون ورثت !
زينب : ولا ورثت ولا شحار يسود وجهها ، هذا كله من تجارة الشسمو ... البودرة يختي
سعاد : الله يرزقها من واسع أبوابة ، ترى بودرة الحليب تجارة منيحة وبتجيب مصاري
زينب : الله يشفيكي يختي . طول عمرك على نياتك ، يختي بحكيلك بودرة بودرة . يعني مخدرااااات
سعاد : اعوذ بالله ، ليكون بتنمي على المستورة وبدك تنتقمي منها عشان ابنها ما تجوز بنتك
زينب : اسكتي اسكتي احسنلك
( ينظر شيطون لأبيه نظرة اسغراب )
شيطون : ليكون زينب هاي اختي وانا مش عارف ؟
ابو شيطون : اصبر يا ولد واتعلم
سعاد : طيب يختي هيني سكتت ، طيب شو اخبار ابو خالد ، سمعت انه باع المطعم
زينب : صح كان بدو يبيعه بس هسة لو دفعولو مليون دينار ما باعه
سعاد : ولو وعلى إيش مهو شقفة مطعم متر بمتر
زينب : الله يشفيكي المتر بمتر صار دونم بدونم ، شكله ما معك خبر ؟
سعاد لا يختي ما معي خبر . خير !
زينب : هذا من ورا لحمة القطاط يلي بعملهم كفتة ونقانق والناس طوابير طوابير ومش ملحق
سعاد : وحدي الله يا مرة ، معقووووول !
زينب : أه وليش مش معقول ، هو انا لا سمح الله بنم على الرجال ، مهو هذا اللي صار
( ينظر شيطون الى أبيه مستغربا )
شيطون : يا بوي اعترفلي انه زينب اختي لو حتى بالرضاعة أنا قبلان ، صح ولا مش صح
ابو شيطون : ولك اصبر خلينا نكمل الفلم
سعاد : طيب خلينا من ابو خالد . وطمنيني عن أبو سامي ، سمعت انه تجوز الثالثة ، صحيح الخبر؟
زينب : اسكتي اسكتي ، هذا انتي بعدك غشيمة ، طلق نسوانه الثلاث واتجوز الرابعة
سعاد : يخرب بيته مهو طول عمره نسونجي هالملعون
زينب : اسمعي هالمفاجأة الكبيرة
( ينظر شيطون ووالده لبعضهم ويضعو ايديهم على أذانهم لتوجيهها باتجاه زينب ليسمعو الكلام اكثر )
... يتبع الجزء الثاني ...