اجـَـلبـنـّـك

ميسون نعيم الرومي
2023 / 12 / 4

اجلبنك يليلي والگـلب سابيني
حسبه اجيبني وحسبه توديني
الاوي بالصبر والصبر يلويني
كلش صلف مايعرف العيبه
اجلبنك يليلي الف تجليبه
***
اجلبنك يليلي اوتيهيت الراي
الـَـتــّـمْهـَه اوتـِطش متعانده وياي
كافـيـنه هضم اتوسلچ دنيايَ
خلصنه العمر بالآه والخيبه
اجلبنك يليلي الف تجليبه
***
اجلبنك يليلي والسهر خاواني
اترجه الجفـن والنوم جافاني
قسه حيل الوكت والعجب راواني
واصوابه كلف ماعنده كل طيبه
اجلبنك يليلي الف تجليبه
***
اجلبنك يليلي وامعاتت آنه اوياك
تحفر بالزمن واتجيب هاذي واذاك
تنسه؟ ابد متگلي ليش اشجاك
عذبت الگلب جـَـتـَّـك امصيبه
اجلبنك يليلي الف تجليبه
***
اجلبنك يليلي والوطن راح اوضاع
اضباع افترسته..لا ابد موش اسباع
واحدهم نـذل لا يشبع اولا ينصاع
واليكره وطنه شلون بالله اتطيعه
اجلبنك يليلي الف تجليبه
***
اجلبنك يليلي والشعب نايم نوووم
تعلم ع الظلم ماعـِنـده بس اللوم
يلطم لطم..والعيشه ع المقسوم
ما يرضه (الحسين)النهجه كله اتبيعه
اجلبنك يليلي الف تجليبه
***
اجلبنك يليلي والحچي ضايع
يرضه اشلون گلي الفقير الجايع
سيطر ع الحكم سافل للوطن بايع
واليكره وطنه ارصاصه ريت اتصيبه
اجلبنك يليلي الف تجليبه
***
اجلبنك يليلي واتمـَعـْنه باللي صار
عقدين امن الزمن بالوطن شبت نار
-(خرفان) صرنه.. والحبل بيد (الجار)-
يلعـب لعـب ياعـيبة العـيـبه
اجلبنك يليلي الف تجليبه
--------------------------------------------------------
4 / ديسمبر / 2023
ســـــــــــــــــــتوكهولم

حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امي
حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت