يـومِـيـَّـه رنـَّـه

ميسون نعيم الرومي
2023 / 2 / 26

عـلى ( الهبـرات ) .. تـتكاتـل اليـوم !
اچلاب السياسه اتضن .. كرسيهه ليدوم
***
كرسيهه أبد مَـ (يدوم) .. والشعب موجود
يگـلبهه عَ الأنـذال ! وايصون الحـدود
***
احدود العراق اليوم .. داسوهه (جيران)-
اعمامه ، اوسبح وارهاب .. اودولة (العثمان)-
***
بسم الله واسم الدين .. فـَـجـِّـرَوْ دمنه
-(لابـو ابو) النـفـطات والشفـنـَه مِـنـَّه
***
بـس الفگـر والموت حصتنه منـَّه
نـَـفط العراق الصار بالگلب ونـَّـه
***
بالگلب ونـَّـه دوم خـَـلصوْ عمرنه
لا يا شــعـب مظلوم يـوميه رنـَّـه
***
مظلوم الشعب يا ناس ، يا عالم الشر
بـيـن الدول ( طشار) ضلينه نِـفـْـتـَـر
***
نطلب (لجوء) اهناك والدمع بالعـيـن
شرق اوغرب واجنوب ، واوصلنه للصين
***
دمعتنه ع الوجنات .. نتوسل ! (ابذل)-
ماندري وين انروح .. ماكو أبد حـَـل
***
كلشـي خسـرنـه اوراح سـمـّونـه لاجئ
حتى ابوطنه ليش .. صرنـه لواجئ
***
لا يا (وطـَـنـَّـه) الچان عـِزّه للاوطان
-(امگصگص) صبح هاليوم بلعـَـتـَه الجيران
***
-(سوريـّه) منه اشوي .. منه (للسعـود)-
و (اردن اوآل صباح) ! والباقي (ليران)-
***
يـتعاركون اليـوم (هـَـيـِسَـوْ) بالفـلوس
بالخزنه مليارات قسموهه ع الروس
***
وابنفس النهج يمشون ، للثروه يبوگون
بالنهب دكتورا ، والبوگ بيه افنون
***
ليـويـن الخمط يحـزاب يـمته تشـبعـون
افگرتوا الشعب ، واطفال صاروْ يجدون
***
يمته الخلاص اشلون ! صارلنه عقدين
عـيـشـة مهانـَه اوذل واتـجِـرّ الـسـنـيـن
------------------------------------------------------
25 /شباط / 2023
ســـــــــــــتوكهولم

حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجر
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امي