حُريتِك هى حُريتى

منى حلمي
2022 / 5 / 30

حُريتِك هى حُريتى ...... قصيدتان
--------------------------------------------------------------------

حُريتى هى كل شئ
وكل شئ بدون حريتى
يصير أبدا ولا شئ
زمان ياما ضحيت بالحب
عشان أبقى دايما حُر
شربت كاس الحرمان المُر
ال الأمرْ انى مبقاش حُر
وأخيرا يا حبيبتى لقيتك
رافضة طاعة الجوارى والعبيد
كسرتى قيود أزمنة موروثة
خلقتى معنى للرجولة جديد
غيرتى فى ثقافة الأنوثة
شامخة وارادتك من حديد
حُريتى حُريِتك وحُريِتك حُريتى
بحبك يا امرأة متمردة
بحبك من كل حريتى
عاشق روحك الثائرة المتفردة
حُريتنا هى الشرف والوطن
اتنين زينا جمعتهم الحرية
مش ممكن يفرقهم بشر
ولا يقدر عليهم الزمن
الحرية كمان ملهاش بديل
لا تباع ولا تشترى
ملهاش ريس ولا كبير
أكبر من أى تمن
-------------------------------------------------------------------------------------
2 - الغنى والفقير
---------------------
الفقير هيفضل دايما فقير
مدام الغنى بيتكرم عليه
طمعان فى ثواب ربنا
فى الدنيا وفى الآخرة
ويمد ايده فى جيبه
ويديله قليل ولا كتير
اخترعوا التبرعات والمعونات
مزاد خبيث للتقوى والتكافل
عشان الفشخرة والاستعراضات
فى الندوات والمؤتمرات والمحافل
محدش بيتكلم
عن اسئصال أصل الفقر
كله بيتكلم
عن تحسين صورة الفقير
ناس تلبس خيش
وناس تلبس حرير
ناس فى عِشش
ناس فى قصور
ناس تاكل سِمان وكافيار
ناس تاكل فضلات القمامة
يروح فين عصفور بجناح مكسور
وسط الديابة والثعالب والنسور
بيقولوا الفقر قسمة ونصيب
وقدر مكتوب على الجبين
لا أيها السادة المرفهون
الفقر مولود من رحم الثراء
ولادة قيصرية مش طبيعية
تكاثرت وتناسلت على أرصفة العراء
------------------------------------------------------------------------------------

حوار مع المفكر اليساري عدنان الصباح حول دور واوضاع اليسار في المنطقة العربية عموما وفلسطين بشكل خاص
د. اشراقة مصطفى حامد الكاتبة والناشطة السودانية في حوار حول المراة في المهجر والاوضاع في السودان