المسرحية

محمد فرج على
2021 / 5 / 9

كل واحد ادى دوره
زى ما بيقول الكتاب
نفذ السيناريو بإقتدار
وشوش خشب
ماسكات
كله بينفذ التعليمات
الكل خاض المعركة
و مثل الدور بالتمام
يا مهزلة مترتبة
بتعليمات م الباشا الكبير
يا سراقين الاحلام
يا خدامين المصلحة
يا صدور ما فيهاش قلوب
يا ابدان من غير ضماير
يا تلمذة الشيطان
لأ ده الشيطان
هو اللى تلميذكوا
يا شلة
يجمعها القذارة و العفن
يا خونة يا غدارين
يا شلة افاقين
يا شلة نخاسين
يا شلة نصابين
مين اللى أوهمكوا
بأنكوا مُخلدين
لو حد خلد قبلكوا
كنتوا انتوا خلدتوا
الدنيا دى
ما فيهاش مُخلد
يا موهومين
الدنيا دى
ما فيهاش مُخلد
لو هو مين
ابليس ذات نفسه
واقف متحير
و عقله شت منه
ازاى غلبتوه بفكركوا
و حيلكوا اقوى منه
الصراحة
و بكل صدق
الاوسكار شوية عليكوا
من اصغر واحد فيكوا
للباشا الكبير
مرت سنين
و كل يوم
تلعبوا نفس الادوار
و برضه بإقتدار
بس بتزيد الحرفنة
الجمهور واقف مستنى
امتى الرواية هتنتهى
طلع الممول قالهم
ما تستنوش
دى المسرحية دى
عرض مستمر !

حوار حول اعمال وارث الكاتبة والمناضلة الكبيرة نوال السعداوي - الجزء الثاني
حوار حول اعمال وارث الكاتبة والمناضلة الكبيرة نوال السعداوي - الجزء الاول