قطر الندى ياغزة .. زجل

محمد نور الدين بن خديجة
2020 / 12 / 26

ــــ قطر الندى ياغزة ...
ــــــــــــــــــــــــــــــــــــــــــــ وتقصف غزة هذا الصباح وأعود لأوراقي القديمة الجديدة






راح الليل وغرب
وطاح الندى ع لقطيب ..
لاباس ماكاين باس
كلمة قالها لحبيب ..
ليام جاتنا بفراق
لفراق جانا بغريب ..
ما كان ناوي ف طلاق
عمرو ما احتاج طبيب ..
واليوم عشقو خناق
أمرو مشبك وصعيب ..
هذا علاش حذرناه
م لموج اللي كان صعيب ..
ولو جا ف اللويات
يمكن يوجد ويصيب ..
وشحال ليه من كديات
وفخاخ ناصبة ترهيب ..
هو يعرف ويزيد
روحو مشدودة بسبيب ..
عنكبوت ناسجة لفتوك
يديه ناوية تقريب ..
يلمس حبو بشكوك
هاجس زايد ترييب ..
ينفخ همو بحنوك
ويصوت رابوز الذيب ..
ف ليلو كفرو مشروك
صلاتو فيها تضبيب ..
يرفع جسمو منهوك
روحو واقفة تنصيب ..
عزمو مقفقف ساهي
لازم مجمر تلهيب ..
آمر ف مرة ناهي
زايد لكدحو تعذيب ..
تلفاز بايت عاوي
مصباحو ف ظلام غريب ..
رفح ف دمو شاوي
دخان خناق لعيب ..
يلعب بنفاسو ف صباح
ويرجع ف المغرب نذيب ..
غزة يجرجرها سفاح
لفاح دمعو بنحيب ..
داز ع لجدار نواح
غبارة هذي وتجيب ..
توصل للحمام اسراح
سينا جاية بنعيب ..
لغراب يصيح فضاح
مازال نكسة ونكيب ..
مروا ع الجدار ودار
مصر يااما وحبيب ..
وابا وعمي والجار
واختي ف الصعيد ونسيب ..
والنيل الصافي لو ثار
يدي مرسالي ويجيب ..
ونجم شاعر يتزار
نمشي لو بسرعة وذبيب ..
نصلي لجاهين وحداد
وناصر محبتو ف الغيب ..
وانقط ثورة لمداد
اشعاري تمجد وتهيب ..
رفح تتكا بسناد
ونمر بقصيدة تطريب ..
شدة ويابن شداد
عبلة وتبغي لحليب ..
عبلة ف عطش وسواد
عبلة وتبغيك تجيب ..
كسرة خبزة وسكر
وزيت وحلوى وزبيب ..
ودوا وبنزين ودفتر
وشوية لحم يطيب ..
وثوب لبنتنا لعروس
سارع وكون لبيب ..
ونسمة نقية لنفوس
غزة تبغي تخضيب ..
تحني طرقان وحيطان
وشعر على سلاح يشيب ..
حارس منبه عثمان
وبو صلاح جارنا لقريب ..
واولادو سبعة شبان
انظارة ما في تعييب ..
يبغوا الحنة ألوان
لصوارخ ترهب ترهيب ..
حنة تصبغ لبدان
برفتقة تحضر وتغيب ..
ساعة يلهبوا في فذان
ساعة للذبابة تعطيب ..
ساعة يفجرو جور الجدران
ساعة ولابد قريب ..
ساعة وتنيش مزيان
تقتل وترجع طبيب ..
تحني وتداوي بشدى
تنسج اعلامك لعجيب ..
حنة ياحنة وندى
طاح ف صباحك ع لقطيب ..
قطيب الليمون شذا
قطيب الزيتون هبيب ..
يهب بصوتو قفزة
ينزل على جلد الذيب ..
حنة يا قطرة غزة
شباكك للعشاق جليب ..
زايد للوجد امعزة *
داس ع الجدار خريب ..
جدار المقت يترزى
مصر الدم يجري ف قليب ..
قليب غزة ينبض نشزة
فرج الله لابد قريب ..
يرجع عنتر لعبلة
شعبك يانيل محال يخيب ..
يجر اوتارك يانبلة
قلب الخاين لابد يصيب ..
أبو تريكة * بين خبلة
كورة مقذوفة بلهيب ..
ويروح الليل يغرب
ويطيح الندى ع لقطيب ..
محنة هذي تتجرب
بلادي ياحب غريب ..
لاباس ما كاين باس
كلمة قالها لحبيب ..



ـــــ زجل مغربي : محمد نور الدين بن خديجة
ــــ كتبت سنة 2008 ولازالت أسطورة غزة تقاوم فلسطين غزة غزة فلسطين .



ــــ الأقرب للقلب في دارجة مراكش والجنوب استعمال القاف المشددة غالبا .. فالقاريء ينبغي انتباهه للأمر أثناء نطق القاف في القصيدة
ــ امعزة [بمعنى محبة ـــ
أبو تريكة لاعب كرة القدم الطي فاجأهم بارتداء قميص عن فلسطين أثناء اللعب .