زمان اهل المصادفة ...

محمد نور الدين بن خديجة
2020 / 12 / 3

ــــــ زمان اهل المصادفة ........ ّ هذا زمان اهل المصادفة ........ الحمير تتبورد والخيل واقفة " ـــ عبد الرحمان المجذوب ,,,,
ــــــــــــــــــــــــــــــــــــــــــ

لقلب ضعيف ....والشوارع سخفانة /
والوقت قصيف ...دوخاتو سخانة /
والحب لطيف ...لكن الناس زعفانة

****

الكانة ولات بفلوس / والناس زربانة /
لهط الحال ..ولهط المال ..
ضاعت لنفوس .. ف اوهام فتانة /
شاري وبايع ..بايع طايع ..
ترونات الطبايع / وعمت لجهالة .

****

ولو احتلوا المنصات ...ودكوا فيها لوتاد /
الكلمة الحرة جمرة ...وراقدة تحت الرماد /
هذ الليل ولو طول ...وتاهت ف لبهيم نجومو ....
على فجرو لابد معول ... والنور يطلق سهومو /
اجيوا نعاودو لحساب ...ونفهموها كيف اللي داز /
الدورة دايرة بعطاب ...واش لغزال تمشي بمنغاز /
واش لحمير تتبورد ...واش لخيل محبوسة ف قفاز /.....



ــــ زجل مغربي : محمد نور الدين بن خديجة
3 شتنبر2013 المغرب .