الشخلعة بين الشيخ والفنان

سلوى فاروق رمضان
2020 / 11 / 22

فى الشهر دا نزل حماده هلال أغنية( الشرع محللى أربعة أصلى بموت فى الشخلعة ) فهاجت علية الدنيا وماجت, فلان ضده والشيخ علان غضب منه ومديحة وفوزى وأحمد ضده برضه , الله كمان مره الله ,والله ياستات عشنا وشفنا بيعتبرونا من جنس البشر بنحس وعندنا كرامة وكده يعنى ياااااه عشت لليوم اللى يحرموا فيه خيانة الست ويعتبروا أمنها النفسى واستقرارها مهمين , يااختى الدنيا بتتغير واللهى بس دا أنا لسه إمبارح بس والنعمة إمبارح بس يامؤمنة لسه سامعة شيخ بيقولك الخيانة دية قصدى تعتدد الزوجات دا حاجة زى ما بتقولى كدا فايدة للست أه واللهى زى ما بقلك كدا كلة فوائد للنسوان حتى بصى ,هنقولها كتير, الخيانة مفيدة للنسوان يوه عليا نسيت قصدى التعتدد مفيد للنسوان ,مفيد للجهاز البولى وللمعدة والأمعاء الدقيقة والغليظة وجارى البحث عشان نشوف هو مفيد للوزتين والحبل الشوكى ولا لاء ,وللأمانة العلمية مش هنسبق الأبحاث وهنقول نتيجتها أيه على الرغم إننا متأكدين أن التعتدد هيبقى مفيد برضه لللوزتين والحبل الشوكى ,وهنفضل نقول هو مفيد مفيد لحد ما يبقى مفيد هو كدا ,والقهر والظلم والخيانة اللى الست بتحس بيهم لالالالالالالا وكمان مرتين لالا هو التعتدد مفيد غصب عنك وعنها وغصب عن الحقيقة بذات نفسها ,والمفتين ودعاة الخيانة أدرى وأعلم . بس المهم إن الدنيا قلبت على حماده هلال , الحمد لله هنام قريرة العين الناس بقت واعية من يوم وليلة إن الستات من جنس الإنسان واللى زينا بقى بتوع حقوق الانسان وأبصر أيه مبقاش ليهم لازمة , هروح أشيل مقالااتى واشوفلى حاجه بقى تانية أعملها , ما خلاص الرسالة وصلت والناس بتتغير , بس وأنا رايحة أنام شوفت أيه شفت اللهم إجعله خير ,الشيخ خالد الجندى مع عمرو أديب فى لقاء قديم قبل ما داعش تظهر كان بيقول لامؤاخذه من حق الدكر من دول ياخد النسوان اللى عاوزهم ! مقصدتش بس لحد أربعة لا لحد ما جيبة يستحمل , يعنى مثنى وثلاث ورباع دا جواز والباقى بالعبودية , اه وعهد الله العبودية عند الشيخ خالد الجندى حلال , كان عمرو أديب هيطق من جنابه يا جدع قاله يعنى أروح اشترى الست قاله اه حلال ( قبل ما داعش تظهر ) بقولها للمرة التانية , يا اختى واللهى انتى مش غريبه كان برج من نافوخى هيطير أصل الشيخ خالد دا هو بعينه اللى هاجم حماده هلال على الأغنية , بس قلت لنفسى مش يمكن الشيخ كبر وربنا هداه , تابعته يا اختى لاقيته مازال مع الخيانة المقننة والمشروعة فى حق النساء , الله طب زعلان ليه من الأخ حماده هلال , الراجل عاوز يتجوز أربعة عشان بيحب الشخلعة وانت عاوز تكمل بملك اليمين اوعى تقلى عشان هتجيب النسوان هتحضر معاهم الدكتوراه مثلا ! مه كله شخلعة ,أية السر اللى قلب الشيخ على الفنان اللى قال أقل من اللى الشيخ شايفة من حقة حتى لو معملهوش فهو سيظل من حقة فى نظرة وبيفتح لغيرة فرصة للخيانة برضة وهدم البيوت .
المهم جابوا الفنان حمادة هلال , الفنان إعتذر وقال( فيما معناه يعنى) يا جماعة أنتم فهمتوا غلط واللهى أنا مش بشجع على كدا دنا بقول للى عاوز كدا وفاكر انه شخلعة فى الاخر هيلاقيها حاجه مش كويسه . واللهى يا اخ حماده انا عن نفسى مصدقة نيتك يا فنان بس هما يا اخ حماده اللى اتوصلتله من فتاويهم خرابة البيوت إنهم مش ضد الشخلعه وجواز الأربعة بل ازيدك مش ضد ملك اليمين من أربعة وانت طالع , الفكره يا أخ حماده إنك بحسن نية فضحت ما يتكتمون هم عليه , انت سميت الأمور بمسمياتها , فما يروجون له إنه العفه طلع مجرد شخلعة , هما مش ضد الشخلعة ولا حاجه زى ما فهمتك بس ضد الناس إنها تفهم ان حقيقة كدا هى الشخلعة هما عاوزين الدكره تتشخلع بس تخرج الفتوى من تحت العمه ولابسه لبس الوقار وتقول عن الشخلعه عفه , تيجى انت بحسن نيه وبطيبتك تفضح وتقول شخلعه, دا أنت كدا طيرت العمه وفضحت اللى مخبياه تحتها أصل الناس اللى مع الخيانه بس وقفت ضدك يا اخ حماده كان شعارهم ( ليالينا الحمرا ليالينا واحنا احرار فيها تفضحنا ليه والعمة ستره بلاوينا )
أما بقى الناس اللى وقفوا ضدك وهما ضد الخيانه كان شعارهم اصل دا فنان ونقدر عليه اصل يا بنى زى ما الست حيطة مايلة لشهوات الدكره الفنان برضه حيطة مايلة للى يحبوا يعملوا مزايدة . ولو كانوا اللى وقفوا ضدك محقين فعلا وأصحاب قضية كانوا هاجموا الشيخ مبروك عطية وهو بيكلم واحده اتخرب بيتها بسبب فتوى منه وبيقلها من حق جوزك يتجوز عليكى من وراكى واما تعرفى تقليله انا ولا هى يقلك هى وكلام مدمر للبيت المصرى من هذا القبيل .
طبعا مينفعش انهى المقال بدون ما اذكر الشيوخ اللى نور الله هاديهم ويعلمون ان الله لا يمكن ان يعطينا كرامة ويعطينا شريعة ضد كرامتنا . اصل مش كلهم يا اختى خلابيص وبيحبوا الشخلعة .العواف