جاسمية تغمز ابو جاسم : اليدري يدري

مؤيد عبد الستار
2018 / 7 / 10

مشهد تمثيلي

* 500 صندوك بيهن غلط و20 % حسبوهن من جديد والف شكيه من المراقبين وتاليه لاحظت برجيله ولا خذت سيد علي
- شنو القصة جاسمية .. اشو تحسبين بيديج وبرجليج .. اجيبلج حاسبة عليكترونية
* اي والله ينرادلي عليكترونية حتى احسب صناديكم اللي لعبتوا بيهن شاطي باطي
- احنا اللي لعبنه بيهن شاطي باطي لو جماعتج اللي جابتهم المعارضة البرلمانية الله يتشرم ، واحدهم ما يندل دربه .. تكولين شارب مي الثول
* ابو جويسم هو انتو خليتو واحد يندل دربه .. اشو يوم تحركون المستودع مال الصناديك ، يوم تحركون المستودع مال العتاد ، يوم تكطعون الكهرباء ، يوم الماي .. ما تكلي بعد منو يكدر يحسب حساب مال اوادم
- هي ما ينرادلها حساب اوادم .. حسبوها حساب عرب .. وكلشي كعد بمكانه ، لا اكو غلط بالانتخابات ولا اكو غلط بالحساب وابوج الله يرحمه .. وطلعن الاوراق مال مجلوب السلف كلهن صحيحات مو مثل ما كالوا اولاد الحلال بيهن غلط .. دكومي صبيلي جاي
* كون باجر يصير مجلوب السلف نايب .. دكن حيل خالاتي وياي
- جا ليش ما يصير نايب . همه اللي صاروا احسن منه ، اشو صار له شهرين يمد البسط والعزايم وما يلحك ، ما ظل واحد بالسلف ما شبع لحم من الخرفان اللي ذبحهن .. والله وبالله لو عدنه عشر نواب بالولاية مثل مجلوب السلف جان شبعنه لحومات طول السنة
* انت خال عينك على البشت واليمني مو على اللحم ...ادري بيك شلون سجه ابو جويسم .. اليدري يدري والمايدري كضبة عدس
- هو البشت هواي علي .. انه جنت احسن شيخ دعايه لمجلوب السلف ، خليت الولاية كله تصفك له وتهوس ليل نهار :
وين اللي يريد كحيل .. مجلوب السلف ما ينام الليل ...
ها ها اسمع يالحاكم :
ننتخبه ومالك ملعب ويانه .. ننتخبه ومالك ملعب ويانه